NUTK-İ ŞERÎF
Yâ Rab beni vahdet-i kübrâya erişdir
Bu katremi nûr-i yem-i deryâya erişdir
Tathîr ederek kalbimi emvâc-ı sivâdan
Ol berzah-ı küll a’zam-ı esmâya erişdir
Mahv eyleyerek perde-i sûretle hicâbı
Dîdâr-ı cemâl Ka’be-i ulyâya erişdir
Nîrân-ı cahîm-i hecr ile yanmakda derûnum
Külhânlarımı gülşen-i ma'nâya erişdir
Feryâd u figân oldu işim fâsılasız hep
Dil mülkünü envâr-ı tecellâya erişdir
Bu kalbimi "Tûr" eyleyerek nûr-i nihâna
"Lâ" perdesini ref' eyle "illâ"ya erişdir
Taklîde beni eyleme mahkûm-i 'ukûbet
Bir aşk-ı hakîkat ile sevdâya erişdir
Aslımla enîs et beni bîgâne bırakma
Şehrâh-ı visâl künh-i müsemmâya erişdir
Sendendir inâyet de hidâyet de se'âdet
Cezb eyle beni Zât-ı Muallâ'ya erişdir
Dünyâ ile 'ukbâ da hicâb tâlib-i Hakk'a
Ol mertebe-i akdes-i bâlâya erişdir
Bu âlem-i sûretle beni etme mukayyed
Itlâk-ı ezel maksad-ı aksâya erişdir
Sâmî kulunun her emeli senden İlâhî
Envâr-ı rızâ mesned-i 'uzmâya erişdir
Eş-Şeyh Abdurrahmân Sâmî Saruhânî
Kaddesallahu Sırrahu'l-âlî
Hiç yorum yok:
Yorum Gönder