Bu Nâsût İçre Ten-perver Olanlar Cânı Bilmezler

NUTK-İ ŞERÎF

Bu nâsût içre ten-perver olanlar cânı bilmezler

Ne cânı hâne-i kalbindeki mihmânı bilmezler

Ledünnîden haberdâr olmayup 'irfânı bilmezler

Nedir 'irfân içinde küfr olan îmânı bilmezler

Ne cândır cân içinde cân olan cânânı bilmezler

Ne sırrdır sırr içinde sırr olan sultânı bilmezler

Benî âdem 'aceb mestânedir sahbâyı fehm etmez

Vücûdu gülşeninde bülbül-i gûyâyı fehm etmez

Sarılmış boynuna ol dilber-i ra'nâ-yı fehm etmez

Özünden kendüye akreb olan Mevlâ'yı fehm etmez

Gezer deryâda mâhîler yine deryâyı fehm etmez

Ana benzer cihân halkı dahi Yezdân'ı fehm etmez

Gözünde nûrun oldur hem dahi cân içre cânındır

Tutar destindir ey gâfil dahi söyler zebânındır

İşiden sem'in oldur hâsılı rûh-i revânındır

Kamu akvâl u ef'âlinde dâim dîde-bânındır

Cihân içinde bî-şübhe vücûd-i mutlak anındır

Ararlar gayrı yerlerde görürler anı bilmezler

Temevvüc eyleyüp deryâ-yı vahdet oldu yem-ber-yem

Vücûdun katresin tarh eyle deryâya gel ey âdem

Te'ayyün cübbesin selb eyle gark ol cümleden akdem

Zühûl etme sakın billah bu durur derdine merhem

Eser yeller gibi ey dil cihân mellâhları her dem

Gezerler bunca deryâyı nedir 'ummânı bilmezler

Gel ey Nûrî sana lutf eylemiş ol Hazret-i Yezdân

Nüzûl etmiş muhassal hâne-i vîrâneye sultân

O bir kenz-i hafî imiş tılsımı sûret-i insân

Zuhûruna hicâb olmuş te'ayyünden meğer ebdân

Hevâ deryâsını Şeyhî 'aceb mi bilmese mürgân

Gör insânı ki cân içindeki cânânı bilmezler

Şeyh Şemseddîn Sıvâsî  Kuddise Sırruh Hazretlerinin nutk-i şerîfi üzerine Şeyh Abdülehad Nûrî Kuddise Sırruh Hazretlerinin tesdîsidir.