Ey Her Dü Serâ Hurşîd-i Eflâk-i Tecellâ

NA'T-I ŞERÎF

Ey her dü serâ hurşîd-i eflâk-i tecellâ

Muhtâr-i Hudâ müftehar-i arş-ı mu'allâ

Leyle-i keremde Kerîm'in va'd-i kerîmi

Tebşîr-i 'azîmdir sana "rabbüke feterdâ"

Ey rehber-i küll rûz-i cezâ kân-i şefâ'at

Gülzâr-ı "denâ" bülbül-i bezm-i "fetedellâ"

Vasfın ne güzel vâsıfıdır sûre-i "ve'n-necm"

"Yâsîn" senâ eyler sana hem "sûre-i a'lâ"

"Ve'l-leyli" kasem-gû şeref ü şöhret ü şânın

'Arşa erişir hâzin-i esrâr-ı "mâ evhâ"

“Ve'ş-şemsi” şehâ mir'ât-ı dîdâr-ı şerîfin

Menzil-gehiniz şeb-i şerâfetde "ev ednâ"

Ey şân-ı kerem la'l-i lebin nehr-i "müddessir"

Sultân-ı rusül bârgehin bâb-ı temennâ

Câm-ı mey-i "hâ mîm" ile kevser-i "müzzemmil"

Verdi hayâtı dillere eyledi müzekkâ

Gönderdi sana hil'at-i "levlâk" ile "le 'amrük"

"İnşirâh" ile "ve'd-duhâ" hem "sûre-i tâhâ"

Verdi şerefin Âdem'e bu şevket ü şânı

Se'âdet tâc-ı serini "alleme'l-esmâ"

İdrîs’e verüp Hazret-i Hakk şân u şerâfet

Yüzün suyu hürmetine "mekânen 'aliyyâ"

Hürmetin ile Nûh-i Necî buldu necâtı

Fermân-ber olup emr-i Nûh’a emvâc-ı deryâ

Şân u şeref ü şevketine Bârî Te'âlâ

Zünnûn'e edip batn-ı hûtu Mescid-i Aksâ

İbrâhim'e nûr oldu nârı hâmil-i nûrun

Olduğu içün İsmâîl'i eyledi ihyâ

Yol verdi hemân Hazret-i Mûsâ'ya yemm-i Nîl

Urdu 'asâyı himmetin ile yed-i beyzâ

Serîr-i Süleymân'e esâme mi bırakdı

Cebrâil ola hâmil-i livâ-yı "fetahnâ"

Yûsuf'u bulan Ya'kûb-veş ber-murâd oldu

Nâib olalı dergehine Zât-ı Mesîhâ
Mir'ât-ı Hudâ nûr-i hüdâ neyyir-i a'zam

Cân verdi cemâl görmeğe Yahyâ Zekeriyyâ

Mescûd-i melek oldu o dem Hazret-i Âdem

Nâşir-i nûrun olduğu'çün Âdem ü Havvâ

Ey nûr-i hüdâ şânına şâyân bu şerâfet

Tenvîr ede 'arş-ı a'zamı Yesrib ü Bathâ

Na'l-i Burâk'ın olsa sezâ seb'a-i seyyâr

Verdi kademin 'arşa şeref Leyle-i Esrâ

Meddâhın iken Hazret-i Hakk 'ilm-i ezelde

Kim vasfına kâdir ola ey nûr-i Te'âlâ

Gözler seni hep bây u gedâ rûz-i cezâda

Mecmû'a-i mahşerde vücûdun mütemennâ

Efrâd-ı ümem hâk-i pâyin kıymeti olmaz

Bahş olsa ne var hâk-i pâyine bütün eşyâ

El-yevm bulunan hâmil-i îmân sana kurbân

Ferdâ düşe bu başımıza sâye-i Livâ

Deryâ-yı keremden n'ola bir katre-i ihsân

Lutfî kuluna eyleye ikrâmını Mevlâ

Alvarlı Efe Hace Muhammed Lutfî

Kaddesallahu Sırrahu'l-Âlî