Yine Geldi Şükürler Şehr-i Rahmet

NUTK-İ ŞERÎF

Sa'âdetle kudûmü kıldı teşrîf

Cihânı yine ol şehr-i mübârek

Anı Ķur`ân'da Mevlâ etdi ta'rîf

Şükür geldi yine şehr-i mübârek

'İbâda eyleyüp ihsân-ı bî-had

Cehennem kapuların eyledi sed

Zuhûr etmek içün minhâc-ı Ahmed

Yine geldi şükür ol şehr-i rahmet

Şükürler edelim dâim Hudâ'ya

Erişdirdi yine bu kutlu aya

Vara derdli olan dârüşşifâya

Şükür geldi yine ol şehr-i rahmet

Münevver etdi nûruyla cihânı

Safâ bahş eyleyüp cism ile cânı

Müzeyyen eyledi bâğ-ı cinânı

Şükür geldi yine ol şehr-i rahmet

Visâlin savmını eyle müyesser

Değil bir kerre ihsân et mükerrer

Ola her rûzumuz tâ 'ıyd-i ekber

Yine geldi şükürler şehr-i rahmet

Olup ism-i samedden câna behre

Umarız bula asl-ı bahri katre

Erişe kadrimiz her lahza kadre

Yine geldi şükürler şehr-i rahmet

Cemâ'atle kılup her şeb terâvîh

Edelim dâimâ tehlîl ü tesbîh

Dil ü câna zıyâ verüp mesâbîh

Şükürler geldi yine şehr-i rahmet

Olup rehber bize Fahr-i risâlet

Devâm üzre olup eyyâm-ı vuslat

Zuhûr eyleye tâ sırr-ı hakîkat

Şükürler geldi yine şehr-i rahmet

Neye kâdir olur yâ Rabbi insân

Senindir evvel âhir lutf u ihsân

Fenâyî derdimende eyle dermân

Şükürler geldi yine şehr-i rahmet

Ehl-i Cennet Fenâyî Mehmed Efendi

Kuddise Sırruh