Ali'dir Rehber-i Râh-ı Hidâyet

NUTK-İ ŞERÎF

Ali'dir rehber-i râh-ı hidâyet

Ali'dir menba'-ı sırr-ı velâyet

Ali'dir ma'den-i lutf u inâyet

Ali'dir kâşif-i esrâr-ı âyet

Ali'dir masdar-ı 'ilm u belâgat

Ali'dir hâme-pîrâ-yı fesâhat

Ali'dir câmi'-i Kur`an Ali'dir

Ali'dir Sûre-i Rahmân Ali'dir

Ali'dir leb-i çâr-erkân Ali'dir

Ali'dir hüccet ü burhân Ali'dir

Ali'dir ibtidâ ile nihâyet

Ali'dir her husûsâta kifâyet

Ali'dir mazhar-ı fazl-ı ilahî

Ali'dir kün fe kânın pâdişahı

Ali'dir bu cihânın şems u mâhı

Ali'dir cümle mahlûkun penâhı

Ali'dir hâmî-i rûz-ı kıyâmet

Ali'dir şâfi'-i yevm-i nedâmet

Ali'dir seyyidü's-sâdât-ı ekrem

Ali'dir vâlid-i sıbteyn-i a'zam

Ali'dir sahib-i mecd-i mufahham

Ali'dir mâlik-i genc-i mua'zzam

Ali'dir cedd-i vâlâ-yı necâbet

Ali'dir asl-ı a'lâ-yı şerâfet

Muhammed'le Ali'dir nûr-ı vâhid

Bu nûru bir bilen oldu muvahhid

Muhammed'le Ali'dir cism-i câvid

Ali rehber Muhammed oldu mürşid

Ali'dir dâder-i Fahr-i risâlet

Ali'dir mazhar-ı nûr-ı sa'âdet

Ali'dir sâkî-i cennât u Kevser

Ali'dir feyz-i Hakk bedr-i münevver

Ali'dir tayyib u tâhir mutahhar

Ali'dir her gazâ içre muzaffer

Ali'dir sâhib-i seyf-i şecâ'at

Ali'dir merd-i meydân-ı celâdet

Ali'dir Hilmiyâ dînim îmânım

Ali'dir vird u tesbîh-i lisânım

Ali'dir tendeki rûh-ı revânım

Ali'dir nûr-ı Hakk yokdur gümânım

Ali'dir rehber-i ehl-i 'ibâdet

Ali'dir ka'be-i erbâb-ı hâcet

Hilmi Dede

Kuddise Sırruh