Es-Salâ Gelsin Gelen Meydân-ı Aşka Es-Salâ

NUTK-İ ŞERÎF

Es-salâ gelsin gelen meydân-ı 'aşka es-salâ

Bâş u câna bakmayan merdân-ı 'aşka es-salâ

İbn Edhem gibi tâc u tahtını terk eyleyüp

Kul olan gelsin beri sultân-ı 'aşka es-salâ

'Âşık-ı sâdıkların bezmine da'vet eylemiş

Bâb açık yol doğrudur eyvân-ı 'aşka es-salâ

'Aklı 'aşkın kaydına bend eyleyenler kandadır

Gelsin ol dîvâneler dîvân-ı 'aşka es-salâ

Tâli' oldu burc-ı nârîde bugün şems-i cemâl

Cism eridüp cân yakan sûzân-ı 'aşka es-salâ

Bahr-ı 'aşkın çün ki her bir katresi deryâ olur

Hazmına kâdir olan yârân-ı 'aşka es-salâ

Ka'be-i vasla irüp Nûrî yolunda sa'y ile

Cânı ihzâr eyledi kurbân-ı 'aşka es-salâ

Abdülehad Nûrî

Kaddesallahu Sırrahu'l-Âlî