NUTK-İ ŞERÎF
Şehâ 'aşk-ı dilârâdır bütün bizi kılan ihyâ
Vücûd u cisme cân veren gönül gözün kılan bînâ
Temevvüc itdi deryâlar anın 'aşk-ı celâlinden
Tekevvün itdi eşyâlar gerek ednâ gerek a'lâ
Kamu 'âlem münevverdir cemâl-i 'aşk-ı pâkinden
Kamu âdem mubassırdır bununla keşf ider ma'nâ
Gerek ins ü gerek cinni feleklerde melekler hem
Bu 'aşkın cilvesiyle dem urur her biri bî-pervâ
Ki kimyâ-yı cihân olmuş neye irse olur bâkî
Fenâ bulmaz o zât aslâ gerek dünyâ gerek 'ukbâ
Vücûdu cümle zerrâtın bu 'aşk ile olur sâbit
Ziyâsı cümle eşyânın bu 'aşk ile olur iclâ
Gönül bir zerre 'aşkından nice esrârı duymuşdur
Füyûzât bahş ider dâim oluben mazhar-ı Mevlâ
Gönül bir başka 'âlemdir muhît-i 'âlemîn olmuş
Muhât olur bu 'aşk ile bu sırları bilir dânâ
Vâr ise 'akl u idrâkin bu 'aşkdan gel haberdâr ol
Duyasın bu rumûzâtı ne hikmetler ider Mevlâ
Bu 'aşkın sırrına mazhar olan vâsıl-ı Hazret'dir
Bu zâhir vuslata şâhid ki "sübhânellezî esrâ"
Ki desti dest-i kudretdir Habîb'in anlasan sırrı
Buyurdu "mâ rameyte iz rameyte" sırrına Mevlâ
Bu 'aşk 'ankâ-yı Hazret'dir ki kûh-ı dilde hükm ider
Kamuya emri nâfizdir bozulmaz bir zamân aslâ
Bu Sûzî gönlü 'aşkınla 'aceb hayretde kalmışdır
Ki 'aşkın şânıdır 'âşıkları her dem ider şeydâ
Ahmed Sûzî
Kuddise Sırruh
❤️🩹
YanıtlaSil