Parça Yahşi Biz Yaman Parça Buğday Biz Saman

NASÎHAT

Söyleyim ey tâlibân
Ver bu söze gûş-ı cân

Şevk ile ehl-i dilân
Söyleye ey bî-nişân

Dâda yetiş el-amân
Ver bana senden nişân

Mahv ola benlik hemân
Tâ diyelim her zamân

Parça yahşi biz yaman
Parça buğday biz saman

Mıstabada bir makâm
Ahz eyleye müstedâm

Elde tuta mey-i câm
Devr eyleye subh u şâm

Bilmeye hâl ü makâm
Nefy ola nâmûs u nâm

Tâ kara nefsin tamâm
Söyleye bunu müdâm

Parça yahşi biz yaman
Parça buğday biz saman

Mıstabanı bâb bâb
Devr ile kılgıl şitâb

'Aşk ile çek mey-i nâb
Tâ olasın müstetâb

Sende doğa âfitâb
Açıla cümle hicâb

Dil göre kendin harâb
Eyleye bunu hitâb

Parça yahşi biz yaman
Parça buğday biz saman

 Şâm u seher külli hâl
Elde geze câm-ı âl

Söyleye şîrîn-makâl
Bezme sala kıyl ü kâl

'Aşka gire lâ ü bâl
Gözleye bir meh-cemâl

Vermeye mihre zevâl
Söyleye erbâb-ı hâl

Parça yahşi biz yaman
Parça buğday biz saman

Dembedem ehl-i niyâz
Söyleye ey şâh-ı nâz

'Ömr kûteh himmet az
Derdime ol çâre-sâz

Ver bana sûz u güdâz
Mahv ola mihr-i mecâz

Keşf ola perde-i râz
Söyleyelim 'aşk-bâz

Parça yahşi biz yaman
Parça buğday biz saman

Servin ede ser-nigûn
Gözleye kaşı dü nûn

Okuya ders-i cünûn
Ahz ede bî-had fünûn

Eyleye bağrını hûn
Derd ile ola zebûn

Tâ ola derdine çûn
Söyleye bunu füzûn

Parça yahşi biz yaman
Parça buğday biz saman

Mîr Nigârî hezâr
Eyleye feryâd u zâr

Açıla zülf-i nigâr
Keşf ola ruhsâr-ı yâr

El vere tâ asl-ı kâr
Ol göre kendin gubâr

Devr eyleye zerre-vâr
Eyleye bunu medâr

Parça yahşi biz yaman
Parça buğday biz saman

Seyyid Hamza Nigârî
Kuddise Sırruh