NUTK-İ ŞERÎF
Nâr-ı 'aşk ile yanup kül olmayan nâdâna yuf
Ölmeden evvel ölüp dirilmeyen bî-câna yuf
Kadrini 'uşşâk-ı Hakk'ın bilmeyüp ta'n eyleyen
Bed-kelâm u bed-likâ vü bed-nefis hayvâna yuf
Zu'm ider ki özü yahşî tâğiyândır ehl-i 'aşk
Yuf o tâğînin özüne itdiği tuğyâna yuf
Mü'minin budur nişânı ki seve mü'minleri
Ehl-i îmâna 'adâvet eyleyen düşmâna yuf
Zemm ü istihzâ vü gıybet itmek anın 'âdeti
Ana insân deyü rağbet eyleyen insâna yuf
Söyleyüp elfâz-ı küfrü güldürür nâsı müdâm
Dinleyüp anın kelâmın gülüşen yârâna yuf
Ger gadab eylerse kalmaz anda aslâ 'akl u dîn
Bî-vefâ vü 'akl u hem bî-dîn ü bî-îmâna yuf
Kândır gamz u nemîme kizb ü sebb ü ifk ü zemm
Halk içinde fitneyi îkâz iden fettâna yuf
Öğretirler anı hussâd şeyhe dahl eyle deyu
Öğreten hussâda hem şeyhine taş atâna yuf
İ'tirâz eyler Cenâb-ı Hakk'a hem Cebrâîl'e
Şeyhine itmez mi yâ ol 'âsî-yi Rahmân'a yuf
Asdikâyı fırka fırka eyleyüp İblîs gibi
Ara yerde ceng ü gavgâ buğz u kîn koyâna yuf
Nân-ı ni'met 'ıyş u sohbet hakkını nisyân idüp
Şol kuduz hayvân gibi her gördüğün kapâna yuf
Çün 'ayân oldu bu yüzden dostumuz düşmânımız
Bize dostluk gösterüp gizli 'adüvv olâna yuf
İsteyen bizim rızâmız varmasın hîç yanına
Bize rağmen ol sefîhin yanına varâna yuf
İtmeniz anınla ülfet ey bizim ahbâbımız
Pes dedik ol münkire yuf hem ana uyâna yuf
Hâsılı anda vefâ yok biliriz lâkin ana
Taş verüp Kuddûsî'ye ur deyüben salâna yuf
Ahmed Kuddûsî
Kuddise Sırruh
Hiç yorum yok:
Yorum Gönder