NUTK-İ ŞERÎF
Zikr u tevhîd ile tâlib Hakk'a vâsıl mı olur
Ma'rifetle hüsn-i hulkdur tâlibi kâmil eden
'İlm-i resmî ile zâhid sarfla kâmil mi olur
Ma'rifetle hüsn-i hulkdur tâlibi kâmil eden
Her ne denlü vâr ise etsin kamu sâlih 'amel
Ma'rifetle hüsn-i hulka bir 'amel olmaz bedel
Darb u devrân ile verme yok yere ömre halel
Ma'rifetle hüsn-i hulkdur tâlibi kâmil eden
Şugl-i esmâ ile etsen aç susuz hem âh ü vâh
Sen günâh anladığından koma sen hergiz günâh
Çille vü halvetde görsen nice bin nûr-i siyah
Ma'rifetle hüsn-i hulkdur tâlibi kâmil eden
Cân işidir Hakk'ı görmek sanma ten işi murâd
Kangı tâlib tâ'at ile oldu 'aceb dilküşâd
Görmedin mi halk-ı 'âlem aldılar mı hiç murâd
Ma'rifetle hüsn-i hulkdur tâlibi kâmil eden
Anladık kim bu görünen sende ola cân ü ten
İrmedin tevhîde şirkde kodu seni mâ vü men
Zât-ı Hakk'a vâsıl olmaz bulmayan hulk-i hasen
Ma'rifetle hüsn-i hulkdur tâlibi kâmil eden
Hâb-ı bîdârında sôfî gördüğündür hep hayâl
Ehl-i 'irfân olmadın kim görüne sana cemâl
Bahr-i zâta gark olup bulmak dilersen ger kemâl
Ma'rifetle hüsn-i hulkdur tâlibi kâmil eden
Gırre olma tâ'atına eyleme hiç iftihâr
Bâb-ı Hakk'a iki kanat oldu züll ü iftikâr
Fânî-i-fillah olup gel olagör Hakk ile yâr
Ma'rifetle hüsn-i hulkdur tâlibi kâmil eden
Ehl-i vahdetden alagör gel hakîkat bî'ati
Tâ ki bu kesret içinde bulasın sen vahdeti
Bir 'amelle tâlibin gitmez bu yolda hayreti
Ma'rifetle hüsn-i hulkdur tâlibi kâmil eden
"Men 'arefe nefsehû" dendiği yetmez mi cevâb
Hakk'ı bilmeğe özünden gayrı var mı bir kitâb
Zât-ı Hakk'a cehlimizden özge yokdur bir hicâb
Ma'rifetle hüsn-i hulkdur tâlibi kâmil eden
Mahz-ı cevherdir kelâmım anlama anı araz
Âb-ı kevserdir içegör kalmasın sende maraz
'Ârifin sözünde yokdur kimseye asla garaz
Ma'rifetle hüsn-i hulkdur tâlibi kâmil eden
Hâb-ı cehl ü hûy-ı bedle muttasıf olmaz Hudâ
Tâlib-i Hakk lâ-cerem verir bu evsâfa cilâ
Gaybiyâ evsâf-ı Hakk'dan olmayasın sen cüdâ
Ma'rifetle hüsn-i hulkdur tâlibi kâmil eden
Sunullah Gaybî
Kuddise Sırruh
Hiç yorum yok:
Yorum Gönder