Zikr ü Tevhîdinle Hakk'dan Sen Seni Yâd Eyledin

NUTK-İ ŞERÎF

Zikr ü tevhîdinle Hakk'dan sen seni yâd eyledin

Geçdi ömrün gaflet ile sôfî Hakk'ı bilmedin

Perde-i nûranî ile kendini şâd eyledin

Geçdi ömrün gaflet ile sôfî Hakk'ı bilmedin

Hakk katında ma'rifetden zikri sandın sen ulu

Ma'rifetden hâlî oldun zikr ile oldun dolu

Zikr-i hâssa hasır etdin Hakk'a varmağa yolu

Geçdi ömrün gaflet ile sôfî Hakk'ı bilmedin

Vird ü esmâ çille rü'yâ oldu nûrânî hicâb

Geçmedin nûrânîden tâ kim sana feth ola bâb

Okumadan ma'rifetden olmadın sen bir kitâb

Geçdi ömrün gaflet ile sôfî Hakk'ı bilmedin

Hakk'a vâsıl eyleyen sandın seni ola 'amel

Kendözüne hor bakup 'ilm-i Hakk'a verdin halel

Ermez ise feyz-i Hakk'dan gönlüne feyz-i ezel

Geçdi ömrün gaflet ile sôfî Hakk'ı bilmedin

Her ne denlü âh u feryâd ile etsen hây u hû

Ma'rifet olmayıcak gelmez sana Hakk'dan koku

Kendini bilmeğe sa'y et 'ârif ol gayrıyı ko

Geçdi ömrün gaflet ile sôfî Hakk'ı bilmedin

Gâfil ü mahcûb kelâmın kendine etdin delîl

Câhil-i billâh olup kaldın hakîkatde zelîl

Ma'rifetden gayrı yokdur bilmedin Hakk'a sebîl

Geçdi ömrün gaflet ile sôfî Hakk'ı bilmedin

Kendi a'mâlindir eden bil seni Hakk'dan garîb

Sen sanırsın ki olasın anın ile Hakk'a karîb

Var yürü sa'y eyle 'ilm-i Hakdan almağa nasîb

Geçdi ömrün gaflet ile sôfî Hakk'ı bilmedin

'Âlimin 'ilmi hicâb ü sôfînin zikri hicâb

Ma'rifetden ikisi de olmadılar behreyâb

'İlm ü zikri perde etme bulagör râh-ı savâb

Geçdi ömrün gaflet ile sôfî Hakk'ı bilmedin

'İlm-i Hakk 'ayn-ı 'amel idüğünü zevk etmedin

Kendi bildiğin koyup kâmil izine gitmedin

Gaybî'nin yüzüne bakup sözünü işitmedin

Geçdi ömrün gaflet ile sôfî Hakk'ı bilmedin

Sunullah Gaybî

Kuddise Sırruh