NUTK-İ ŞERÎF
Geldi 'izzet ile eyyâm-ı sıyâm
Kılalım hamd ü senâ Mevlâ'ya
Umarız hâsıl ola cümle merâm
Kılalım hamd ü senâ Mevlâ'ya
Bizi irgürdü çü bu eyyâma
Lutfunu eyledi hâss ü 'âmma
Nice tahrîr ide fazlın hâme
Kılalım hamd ü senâ Mevlâ'ya
Şehr-i Şa'bân ü Receb'le Ramazân
Vahdeti sırrın iderler i'lân
Mebde' üçdür bu makâmâta hemân
Kılalım hamd ü senâ Mevlâ'ya
Mürg-i ķudsîyle olup dem-sâz
Sem'-i câna ire gaybdan âvâz
Vatan-ı asla idegör pervâz
Kılalım hamd ü senâ Mevlâ'ya
'Ârifân itdi 'urûc eflâke
Bakmadılar bu hazîz-i hâke
İrdiler Hazret-i nûr-i pâke
Kılalım hamd ü senâ Mevlâ'ya
Ref' ola çün ki 'ayndan perde
Gördü matlûbunu bahr ü berde
Hâzır u nâzır O'dur her yerde
Kılalım hamd ü senâ Mevlâ'ya
Bizi yokdan nice itdin ise vâr
Yine fazlını sen eyle izhâr
İt Fenâyî'ye 'atânı her bâr
Kılalım hamd ü senâ Mevlâ'ya
Ehl-i Cennet Fenâyî Mehmed Efendi
Kuddise Sırruh
Hiç yorum yok:
Yorum Gönder