Zâhidâ Terk-i Hevâ Eyleyelim Etme Heves

NASÎHAT

Zâhidâ terk-i hevâ eyleyelim etme heves

Ne revâ bunca zamân işledin hevâ vü heves

Geçirüp 'ömr-i 'azîzi eyledin şöyle 'abes

Fâide vermedi aslâ zerrece perr-i meges

Târik-i nefs ü hevâ ol edelim Hakk'a heves

Bu cihân lezzetini terk ile âgâh olalım

Yatmayalım geceler hîz-i sehergâh olalım

Yüzümüz yere sürüp tâlib-i dergâh olalım

Hizmet-i Hakk'da bu niyâz ile her-gâh olalım

Târik-i nefs ü hevâ ol edelim Hakk'a heves

Nice bir fırsat-ı kuvvetle etdin 'ömrü telef

Bu hevâ ile olur cümle ef'âlde seref

'Acabâ sana vasiyyet böyle mi kıldı selef

Ne revâ ile fikr bu mudur şart-ı halef

Târik-i nefs ü hevâ ol edelim Hakk'a heves

Nice bir hizmet-i Hakk'da böyle kâhil olasın

Uyuben nefs ü hevâya Hakk'dan gâfil olasın

Bilemem ki bu hâl ile matlûba nâil olasın

Hele mümkün olamaz Mevlâ'ya vâsıl olasın

Târik-i nefs ü hevâ ol edelim Hakk'a heves

Sûziyâ zikr-i Hudâ eyleyelim 'aşk ile gel

Geçirüp fırsatı elden deme sen leyte le'al

Kayd-ı dünyâ ile etme kendini tûl-i emel

Mâsivâyı getirüp gönlüne hiç verme halel

Târik-i nefs ü hevâ ol edelim Hakk'a heves

Ahmed Sûzî

Kuddise Sırruh