Merhâbâ Yâ Şeh-i Evreng-i Velâyet Merhabâ

NUTK-İ ŞERİF

Merhâbâ yâ şeh-i evreng-i velâyet merhabâ

Yâ Aliyye'l-Murtazâ yâ Hazret-i Şîr-i Hudâ

Merhabâ yâ Haydar-ı Kerrâr-ı meydân-ı vegâ

Safder-i sâhib-livâ-yı server-i kişver-güşâ

Sıhr-ı Sultân-ı rusul çift-i Zehrâ-yı Betûl

Vâlid-i sıbt-ı mükerrem ibn-i 'amm-i Mustafâ

Ey cihâd-ı fî-sebîlillaha sâhib-Zülfikâr

Zülfikâr'ı saf-şiken-dâr-ı sufûf-i eşkiyâ

Kâli'-i bâb-ı kılâ'-i üstüvâr-ı Hayberî

Kâmı'-ı lâd-ı bikâ-ı küfr ü tuğyân-intimâ

Kâtil-i küffâr-ı küfr-âyîn-i Bedrîn u Huneyn

Mâhi-i zulmât-ı şirk u nâşir-i nûr-i hüdâ

Fâtih-i feth-i mübîn nâsır-ı nusret-rehîn

Râyet-efşân-ı şehenşâh-ı huyûl-i enbiyâ

Âdem-i arz-ı velâyet pâdişah-ı mülk-i dîn

Câmi'-i cemî'-i 'ulûm-i evvelîn-i evliyâ

Kâid-i minhâc-ı kurb-i Ka'be-i vasl-ı ilâh

Pîşvâ-yı asfiyâ kıble-nümâ-yı etkiyâ

Serverâ dâd-perverâ mevlâ-yı 'âlem-perverâ

Ey veliy-yi müstakil mâlik-i arş-ı istivâ

Sensin ol nûr-i hakîkat mazharı kim şânına

Nûr-i vâhidden zuhûr etdin demişdir Mustafâ

Fahr-i 'âlemden senin şânında hem etdi zuhûr

Cismüke cismî ve rûhî rûhuke yâ Murtazâ

Sensin ol şâh-ı velâyet kim kerâmâtın görüp

Sebkat-i 'ilm-i ilâhî etmeseydi iktizâ

Zâtına emr-i hilâfetde tekaddüm etmeyüp

Hazret-i Bekr u 'Ömer 'Osmân ederdi iktidâ

Tâ zamân-ı âferînişde be nakl-i Cebraîl

Sen olup gavvâs-ı bahr-i nûr-i zât-ı ıstıfâ

Cevher-i mâhiyyetinden hall-i işkâl etmeğe

Eyleyince bârgâh-ı Zü'l-Celâl'e ilticâ

Nâvek-i nîm-nigâhı şâhbâz-ı çeşminin

Eyledi Rûhü'l-emîn'i perr ü bâlinden cüdâ

Cebr-i noksân etmeğe tesbîh olup bâ emr-i Hakk

Yâ 'Alî yâ Bû'l-Hasen yâ Bû Türâb u İlyâ

Etdi mâfâtı telâfî Cebraîl o sübhadan

Bildi sensin Şîr-i Merdân-ı Resûl-i Müctebâ

Sensin ol Şîr-i Hudâ kim dîn-i pâk-i Ahmed'i

Eyledi bâzû-yı zûrunla müeyyed Kibiryâ

Şânını tebcîl içün arş üzre yazmışdır Hudâ

Eyyedallahu Te'âlâ Ahmeden bi'l-Murtazâ

Nâm-ı pâkin bî-gümân ser-nâme-i dîvân-ı Hakk

Zât-ı pâkin mazhar-ı zâtı Hudâ'dır bî-riyâ

Âşiyânın bîşe-i kuhsâr-ı Kâf-ı lâ-mekân

Cilvegâhındır fezâ-yı lâ sabâh u lâ mesâ

 Pençe-i hükmünde sergeşte peleng-i âsumân

Ser-zede çengâl-i zûrunda zemîn-i mübtelâ

Târ-ı tedbîrinle âvıhte kanâdîl-i cihân

Mihr-i te'sîrinle tâbende şumu'-i mâsivâ

Âsitân-ı rıf'at ü iclâline ermez zamân

Olsa ger subh-i ezel şâm-ı ebed subh u mesâ

Müntehâ-yı kadrini derk edemez Cibrîl hiç

'Akl-ı evvel seyrine olsa cenâh-ı ibtidâ

 Sensin ol gencîne-i kenz-i hafâ yâ Bû Türâb

Kim yatar cenbinde olmuş Zülfikâr'ın ejdehâ

 

Görse ebrû-yi cmâlinde eger çîn-i celâl

Kân içer tîr-i belâ işkest olur kavs-i kazâ

Bir şerâre düşse kahrından bulur hep ihtirâk

Sâbit ü seyyâre-i ecrâm-ı gayr-ı müntehâ

Ey olan zülf-i siyehkârı şebistân-ı ezel

 Şem'-i hüsn-i lâ-yezâli mihr-i subh-i lâ-fenâ

 Nûr-i vechin erse zulumât-ı dil zerrât olur

Nûr-i hurşîd-i tecellâya 'urûş-i i'tilâ

 Düşse ilminden olur deryâya bir katre eger

Katre-i deryâ hurûf-i âliyâta mübtedâ

 Her nigâh-ı şefkatinden her gubâr-ı hâk olur

 Mûsâ'ya Tûr-i tecellî 'Îsâ'ya tahte's-serâ 

Duysa bir gülbang-i tevhîdin kilisâ beyt olup

Heykel-i nâkûs olur elbette tâc-ı pârsâ

 

 Şem'-i bezm-i zühdün eyler bir dem olsa lem'a-pâş

Zulmet-i mâhî-i küfrü bahr-i nûr-i ihtidâ

 Fâyiz-i enfâs-ı cân-bahşın edüp nârı cinân

Her şerârı nûr edüp eylerdi hûr-i mehlikâ

 Sen o bahr-i cûdsun kim kûze-i ihsânına

Çeşme-i hurşîd-i 'âlem-tâbdır bir katre mâ

 Sensin ol zıll-i İlâh u rahmet-i 'âlem k'ider

Keff-i lutfundan iki 'âlem nasîbin ictinâ

Hiç kâfir bulmaz âhir Zülfikâr'ından rehâ

Lutf u ihsânından olmaz hiç mü'min bî-nevâ

 

Ey olanlar şem'-i bezm-i 'aşkının pervânesi

Sayd eder şehbâz olup burc-i se'adetden hümâ

 

 Dergehinde nâle tutmuş mûrlar merdâne-vâr

Taht u dîhîm-i Süleymân'a olur fermân-revâ

Dâmen-i lutfun penâgâh eyleyen serbâz-ı 'aşk

Gösterir 'arş olsa da tâc u kerâmetden ibâ

 Ben ne hâcet kim edem vasfın yeter evsâfına

Sûre-i Furkân içinde beyyinât-ı "hel etâ"

 Makdeminle reşk-i firdevs eyledin dil hânesin

Sâye-i kadd-i hırâmânınla kıldın pür-safâ

 Zulmet-âbâd-ı gam u endüh idir vîrâne dil

Oldu feyz-i nûr-i dîdârınla bir gülşen-serâ

 Yâ Ali yâ İlyâ yâ Bu'l-Hasen yâ Bû Türâb

Kıl kerem bîmâr-ı aşkam eyle lutfunla devâ

Ten marîz u rûh bî-tâb u gönül sermest-i 'aşk

Râh-ı gümgeşte vü ma'şûk etmiş 'âlemden gınâ

Öyle kim işkeste-bâlem nutka yokdur tâkatim

Yoksa vasfın gülşeninde böyle etmezdim serâ

 

Vasf-ı pâkinden olurdum öyle mu'ciz kim olur

Cevher-i kilkimden ervâh-ı mücerred rû-nümâ

 Merhamet kıl eyle bu na't-i perîşânım kabûl

Âsitânında  bi-hakkı hûn-i Şâh-ı Kerbelâ

 Şems ıtnâb-ı sühan etme yeter kıl tasliye

Söz tamâm oldukda çün dîrîne 'âdetdir du'â

 Vechini tekrîm edüp Hakk zâtına kılsın selâm

Tâ döner çarh u tulû' eyler meh ü mihr ü sehâ

Osman Şems Efendi

Kuddise Sırruh