Elâ Ey Bülbül-i Dil Bâğ-ı Vahdetden Haber Söyle

NUTK-İ ŞERÎF

Elâ ey bülbül-i dil bâğ-ı vahdetden haber söyle

Yeter bu 'âlem-i mik içre kesretden haber söyle

Nice bir rûze-dâr-ı mâsivâ-yı Yâr olam böyle

Cemâlin göster anın 'ıyd-ı vuslatdan haber söyle

Murâdım ka'be-i vaslında kurbân olmadır anın

Döküp hûn-i ciğer bir dem şehâdetden haber söyle

Diyâr-ı gurbete düşdüm vatandan dûr olup âhir

Ezelki 'âlemi bildir velâyetden haber söyle

Dilâ nûş eyledinse zemzem-i vaslın o cânânın

Demâdem mevc uran şol feyz-i hikmetden haber söyle

Eğer bildinse bu Kâf-ı vücûd içre nedir 'Ankâ

O bezme irdin ise 'ıyş u 'ışretden haber söyle

Dilinde tutma tûtî-vâr 'irfân sükkerin cânâ

Mezâk-ı ma'rifet câm-ı hakîkatden haber söyle

Derûnum gamla peymâne-veş leb-ber-leb olmuşdur

Yeter râzın nihân it gizli sohbetden haber söyle 

Nesîm-i rahmet-i Hakk açdı mı gülzâr-ı ma'nâyı

Kerem kıl gel 'inâyetden her âyetden haber söyle

Ana 'âşık olanlar ravza-i cennâtı neylerler

Ko vasf-ı gayrı gel sırr-ı hüviyyetden haber söyle

Benim şol kimiyâ-yı 'aşka kâbil mi 'aceb gönlüm

Bu fakr u fâkadan kurtar o devletden haber söyle

Harîm-i Yâr'a çokdan arzu eder dil ü cânım

Bu yolda rehnümâ olgıl ziyâretden haber söyle

Dilimde çaşni yokdur mezâk-ı telh-i firkatle

Şekerler sun dehânından o lezzetden haber söyle

Eğer gördünse cânânın cemâlin âşikâre sen

'Iyân bildir yeter ey dil rivâyetden haber söyle

'Azâb-ı mâsivâya mübtelâyem tâ-be-key böyle

Vücûdum hâlis altun eyle rahmetden haber söyle

Kulağım hâlîdir sayt u sadâ-yı zühd ü takvâdan

Bana şol "küntü kenz"i aç muhabbetden haber söyle

Benim nefsimle cengim vâ'izâ besdir yeter sen de

Dilîr ol sözde gavgâ-i kıyâmetden haber söyle

Yeter ey Hakk'a mahrem Hakkı'yı sevdâya saldın sen

Bugün keşf eyle râzı sırr-ı Hazret'den haber söyle

İsmâil Hakkı Bursevî

Kaddesallahu Sırrahu'l-Âlî