Bulamaz Hakk'ı Yiyüp Uyuyan

NUTK-İ ŞERÎF

İden olma sen özüne ziyân

Bu sözüm işit ne kılur beyân

Gözün aç gelüp göresin 'ayân

Gerek ise Hakk sana her zamân

Yiyüp uyuma duruben uyan

Bulamaz Hakk'ı yiyüp uyuyan

Ko cihânı gel ara cânını

Bulabilesin ulu şânını

Döker ise ger yire kânını

Yine sen gözet anın ânını

Yiyüp uyuma duruben uyan

Bulamaz Hakk'ı yiyüp uyuyan

 

İçüben yimek behâim işi

Sana âdem ol didi ey kişi

Uyuyam deyü bileme dişi

Ki uçar gider bu kafes kuşu

Yiyüp uyuma duruben uyan

Bulamaz Hakk'ı yiyüp uyuyan

Sana ben dimem yürü gâfil ol

Özün anla gel berü 'âkil ol

Gice gün hemân Hakk'a şâgil ol

Ko kamu işi ana vâsıl ol

Yiyüp uyuma duruben uyan

Bulamaz Hakk'ı yiyüp uyuyan

Bir iyice tut kulağın bana

Bu durur sözüm sana dâimâ

Ger umar isen bulasın bekâ

Dahi yarın ol iresin Hakk'a

Yiyüp uyuma duruben uyan

Bulamaz Hakk'ı yiyüp uyuyan

Sözüm anla gel benim ey püser

Didi Gurbî çün bana bu yeter

Ezel 'ahdini ebedî güder

Ol ulusuna çekilüp gider

Yiyüp uyuma duruben uyan

Bulamaz Hakk'ı yiyüp uyuyan