NUTK-İ ŞERÎF
Sen ey gönül diler isen ki bulasın Nakkâş
Bu nakş u sûrete kalma vü gözleme göz ü kaş
Seversen ol yüce şâhı ko mâsivallahı
Ki 'aşk eri dilemez mansıb u ma'âd u ma'âş
Yolunda sâdık isen 'aşk içinde ey dervîş
Be-küllî kendiliğinden kesil ü dosta ulaş
Kimesne 'aşk ile 'ârı bir elde cem' idemez
Gel imdi 'âşık isen ol melâmet ü evbâş
Er ol durur ki dışından içi hoş ola müdâm
Ger eyle olmasa bâri bir ola bu iç ü taş
Seni ulu görüben kimseye alu bakma
Ki Hakk'dan ayru değildir cihânda her kuru baş
Görene gün bigi her zerreden olur zâhir
Velî ki görmedi görmez çü gün yüzün huffâş
Eger müsâfir isen kıl sefer vücûdundan
Geç ikilik ovasından o birlik iline aş
Revende çünki teferrüc kılımaya şehreyn
Hiç ana fâide kılmaz gezerse bin dağ u taş
Muhâcir olur isen kıl menâhiden hicret
Gazâ sevâbı gerek ise nefs ile uğraş
Şu lokma hırka içün halk ile savaş itme
Eğer savaşır isen dâim İblîs ile savaş
Nedir bu şöhret ü gavgâ nedir bu hırs u tama'
Çü nefse kanda ise bulunur bir etmek ü aş
Sakın seni komasın kulluğundan o şâhın
Ey hâce 'avrat ü oğlan kız u kul u karavaş
Puta tapanlar anılsa katı 'aceblersin
Zihî 'aceb ki put ola sana bu mâl u kumaş
Çü her yonulmadık ağacı oda yakarlar
Seni dahi eğer üstâd kılmaz ise tıraş
'İbâdet eyle sakın kılma 'ömrünü zâyi'
Ki bir gün öliseriz ger yaşar isek bin yaş
Riyâ vü süm'adan it tâ'atını key hâlis
Ko halkı Hakk içün işle vü gözleme şâbaş
Nedâmet ırmağına gir yazıkların kirini
Yu tevbe sabunu birle tap arı söze bulaş
Meğer bi arı gönül iltesin ana yoksa
Hakîr-i tuhfe durur ol eşikde cân ile baş
Elinde iş vâr iken key düriş Kemâl Ümmî
Belinde nakdini sakla yolunda hazır baş
Ne kim görüp işidüp anlar isen sakla anı
Sakın hazâinini müdde'îden eyleme fâş
Kemâl Ümmî
Kuddise Sırruh
Hiç yorum yok:
Yorum Gönder