Sor

NUTK-İ ŞERÎF

Müştâk isen dîdârına ulü'l-ebsâr olandan sor

'İlm-i ledün dersin oku 'ârif-i esrâr olandan sor

Bir pâdişaha kul ol kim göstere doğru yol dosta

Senden seni gel kıl halâs 'aşka süvâr olandan sor

'Alleme'l-esmâ remzini bilmek dilersen sen de

İsm-i âdem mazhar-ı zât zâta envâr olandan sor

Ulü'l-elbâb bilmez haber andan haber sorma sakın

Evliyâ-yı dil-ârâyı dâim ara olandan sor

Senden lisân gâib olup kendin dahi gayb ol yürü

Gaybü'l-gaybda gayb olmağı mahv-ı tebâr olandan sor

Görür mü hiç gözsüz olan yârin cemâlin bî-hicâb

Dâdâr-ı yâri görmeği 'ayn-ı dîdâr olandan sor

Mûsâ gibi 'ilm isteyüp var mecma'u'l-bahreyne bil

Hızırleyin o mazharı 'âlim-i yâr olandan sor

Katre iken 'ummân-ı bî-pâyân olam dirsen eğer

Ol mecma'u'l-bahreyni sen sâhib-i esrâr olandan sor

Düşme ayaklar altına zerre gibi olma sakın

Şems-i hakîkati gel sen şems-i envâr olandan sor

Çeşm-i cânı açasın sen vech-i cânânı göresin

Vechiye-i şuhûdunu vech-i dildâr olandan sor

Hep mahfîler olmuş 'ayân yâ sen niçün göremedin

Dirsen görem sen yârini zât-ı fahhâr olandan sor

Gel sen Süleymânlar gibi hâkim ol kuş dilin anla

Gel bu dili kâf-ı sırda 'ankâ-yı yâr olandan sor

Bilmez iken yâ sen seni yâ sen niçün serserîsin

Deryâyı vahdeti var sen ulu ebhâr olandan sor

Ey 'âşık-ı deryâ-sıfat nefsine aldanma sakın

Pür-hîlesin nefs elinden emîn-i yâr olandan sor

Ey derdimend her demde sen 'ömrü beyhûde geçirme

Var anı sen cân içinde ulü'l-esrâr olandan sor

"Küntü kenz"in hep serteser sırr-ı nihânı sensin sen

Andan fenâ künc-i mahfî Ünsî dildâr olandan sor

Hasan Ünsî

Kuddise Sırruh