Sermest-i Câm-ı Aşkam Hayrân-ı Beng-i Vahdet

NUTK-İ ŞERÎF

Sermest-i câm-ı 'aşkam hayrân-ı beng-i vahdet

Velhân- vâdî-i şevk reyyân-ı âb-ı vuslat

Sebbâh-ı bahr-ı 'irfân seyyâh-ı 'âlem-i cân

Miftâh-ı 'arş-ı Rahmân mısbâh-ı küll-i zulmet

Sanma ki bûm-i şûmem olma harâba mâyil

Şehbâz-ı evc-i kudsem saydım-durur hakîkat

Âzâde-i dü gîtî bende'v fakîr-i 'aşkam

Ne dîn ile mukayyed ne küfr ile mümakkat

Ne keşf ü kerâmet ne zühd ü ne 'ibâdet

Ne havf-ı nâr-ı dûzah ne hod recâ-yı cennet

Tûtî-i bâğ-ı kudsem nutkum şekerden ahlâ

Zevkini duymaz anın zâğ u zagan-tabî'at

Gel ehl-i ma'nâ isen ehlen ve merhaben lek

V'er ehl-i da'vâ isen beynî ve beynek elbet

Da'vâ-yı kâzib ile tutdu cihânı cühhâl

Her biri şeyh-i 'âlem bilmez nedir meşîhat

Sûretde Hızr u İlyâs sîretde azlem-i nâs

Ahvâli gadr u vesvâs ef'âli mekr ü hîlet

Destârı kubbe denlü  yok dîni habbe denlü

Hubbu libâs ü cübbe hıl'at ana hadî'at 

Ey sayd-ı kayd-ı şehvet vâbeste-i riyâset

Mağrûr-i keyd-i şeytân mahmûr-i câm-ı gaflet

Oldun esîr-i dünyâ kaldın fakîr-i 'ukbâ

Sevdâ-yı sûd ederken sermâyen oldu gâret

Nûş et mey-i mehabbet tâ cûşa gele cânın

Tekmîl-i mertebet kıl anla nedir hüviyyet

Tahsîl-i ma'rifet kıl bul sırr-ı "küntü kenz"i

Gûşunda eyle mengûş sözüm sana nasîhat

Künc-i vücûdun içre ol genci buldun ise

Erdin gınâ-yı câna gitdi 'anâ vü mihnet

Bildim rumûz-i kenzi bedr-i münîr-i lâhût

Mihr-i sipihr-i nâsût sar-ı serîr-i kurbet

Sultân-ı ehl-i ma'nâ Mollâ'yı Rûm a'nâ

Burhân-ı dîn ü takvâ serçeşme-i hidâyet

Dürr ü cevâhir olur bî-şübhe seng-rîze

Ednâ mürîdi anın ger eyler ise himmet

Serdefter-i me'ânî evlâd-ı zü'l-fihâmı

Huddâm-ı bâ-kirâmı fihrist-i vecd ü hâlet

Şerh ü beyâna gelmez ahvâl-i Mevlevîler

Bilmek dilersen anı bir ehle eyle hizmet

Şâhâ vü kâr-sâzâ ol Hazretin hakkıyçün

Dahi kelâm-ı hakkı k'oldur sirâc-ı ümmet

Yâ Rab şu dîde hakkı aşkınla aka eşki

Yâ Rab şu sîne hakkı şevkinle ede ülfet

Yâ Rab be hakk-ı sırr-ı sultân-ı her dü kevneyn

Yâ Rab be hakk-ı birr-i cân-ı şeh-i velâyet

Yâ Rab be hakk-ı hükm-i er-râsihûne fi'l-'ilm

Kulun Rusûhî'ye ver 'ilm ü kemâl ü hikmet

Vuslatdan ırma cânın 'aşkınla kıl cenânın

Zikrinle kıl dehânın lutfundan eyle rahmet

İsmâil Anakaravî

Kuddise Sırruh