ŞEHR-İ SIYÂM
Aşk ile döndü yine çerh-i zaman
Şevk ile geldi mübârek Ramazân
Tecellî eyledi rahmet-i Rahmân
Şevk ile geldi mübârek Ramazân
Kalb-i mü'min şâdân ü handân oldu
Zikr ü tahmîd ile sühândân oldu
Mâh-ı gufrân şeytâna zindân oldu
Şevk ile geldi mübârek Ramazân
Evveli rahmet buyurdu ol Resûl
Cümlenin maksûdu buldu hem husûl
Diler isen eylemek Hakk'a vusûl
Şevk ile geldi mübârek Ramazân
Ortası mağfiretdir bî-iştibâh
Sâimin bir nefesi olmaz tebâh
"Ene eczî" buyurdu ol Pâdişâh
Şevk ile geldi mübârek Ramazân
Sonu nârdan âzâd dürür lâ-cerem
"Ecrahum bi-gayri-hisâb"dır kerem
Fetholur Leyle-i Kadir'de İrem
Şevk ile geldi mübârek Ramazân
Ger dilersen bulasın fevz ü necât
Miftâhıdır cennetin savm ü salât
Mürde diller buldular yeni hayât
Şevk ile geldi mübârek Ramazân
Hiç bir ümmet ermedi bu devlete
Bunca ihsân olmadı bir millete
AŞKÎ müjde Ümmet-i Muhammed'e
Şevk ile geldi mübârek Ramazân
Es-Seyyid Eş-Şeyh
Muzafferüddîn Aşkiyyü'l-Cerrâhiyyü'l-Halvetî
Hiç yorum yok:
Yorum Gönder