Mürg-i Cânım Olmak İster Fâriğ-i Dâr-ı Fenâ

Mürg-i cânım olmak ister fâriğ-i dâr-ı fenâ

Eylemez eski kafesdir bu bedenle iktifâ

Mâil-i hâl-i tecerrüddür arar mülk-i bekâ

Âkıbet köhne libâs-ı cismden olur cüdâ

Çün ki aksâ-yı murâdı vuslat-ı zât Hudâ

Merci'idir âlem-i lâhute ister irtikâ

Halka-i ömrüm hemân tenk olmada subh ü mesâ

"Accilû bi't-tevbeti kabel'l mevt"dir âcil devâ

Seyr-i enfâsım gibi evkâtı darlaşmakdadır

Sığmaz oldu hânesi rûhum kabarlaşmakdadır

Saç sakallar berf-i şeyhûhetle karlaşmakdadır

Mehl arar her ân ecel ile bâzârlaşmakdadır

Artık Azrâil'e teslîmi kararlaşmakdadır

Âcilen kervân-ı ervâha katarlaşmakdadır

Halka-i ömrüm hemân tenk olmada subh ü mesâ

"Accilû bi't-tevbeti kabel'l mevt"dir âcil devâ

Gelmenin ger kesb-i irfân ise sırr u hikmeti

Zikr ü fikr-i Hâlık etmekse kemâl-i hizmeti

Ric'atin de fart-ı isti'câldir bu rıhleti

Tûl-i dehrin var mı ömr-i âdem ile nisbeti

Meksinin dünyâda gûyâ ân gibidir sür'ati

Olmalıydı ömr-i Nûh anın ekall-i müddeti 

 Halka-i ömrüm hemân tenk olmada subh ü mesâ

"Accilû bi't-tevbeti kabel'l mevt"dir âcil devâ

Mevsim-i vakt-i şebâbın görmeden ezhârını

Etmeden bâğ-ı hayâtın ictinâ esmârını

Bilmeden binde birin bu hilkatin esrârını

Gelmemiş mi âleme ikmâl içün efkârını

Neş'e-i uhrâ içün hazırlamış mı yârını

Cân hisâb etmez mi insânın kısa a'mârını

Halka-i ömrüm hemân tenk olmada subh ü mesâ

"Accilû bi't-tevbeti kabel'l mevt"dir âcil devâ

Bir tarafdan ıztırab eyler gam-ı firkat ile

Cümle a'zâ-yı teni tahrîk eder nizbet ile 

İltizâm eyler bekâsın mu'tedil hâlet ile

Uğraşır merdâne def'-i düşmen-i 'illet ile

Mahvolunca hıfzeder ten kal'asın gayret ile

Son nefesde tabiyeden ayrılır hasret ile

Halka-i ömrüm hemân tenk olmada subh ü mesâ

"Accilû bi't-tevbeti kabel'l mevt"dir âcil devâ

Herkesin vicdânıdır bu hâleti tasvîr eden

Cevherinde cem'-i ezdâdı bulup tezkîr eden

Ol değil mi söyleyen bu sözleri tahrîr eden

Birbirine pek münâkız fiiller tedbîr eden

Kendi sâil kendi mes'ûl kendidir taksîr eden

Var mı hâricden muzâhim işlerin tağyîr eden

Halka-i ömrüm hemân tenk olmada subh ü mesâ

"Accilû bi't-tevbeti kabel'l mevt"dir âcil devâ

Hıffet-i asliyyesinde var hele bir inkılâb

Sıkletin levsi anâsırdan mı etmiş iktisâb

Uzamış yoksa tenâsühden zamân-ı iğtirâb

Gösterir avdet içün gâhi tereddüd gâh şitâb

Belki menfâ-yı bedende ârız olmuş bu hicâb

Muhtemildir muzdarib eyler anı havf-ı itâb

Halka-i ömrüm hemân tenk olmada subh ü mesâ

"Accilû bi't-tevbeti kabel'l mevt"dir âcil devâ

Hilkatince görünür kim cunhadan ma'sûmdur
Cevher-i zâtı mücerred maddeden mahrûmdur
Etmiş ebdâna ta'alluk künhü nâ-ma'lûmdur
Cisme te'sîr u tasarruf etdiği meczûmdur
Cümle âlât-ı beden huddâm o şâh mahdûmdur
Doğrusu bir sırr-ı mahz-ı Sâni' u Kayyûm'dur

Halka-i ömrüm hemân tenk olmada subh ü mesâ

"Accilû bi't-tevbeti kabel'l mevt"dir âcil devâ

 Ehl-i hikmet ihtilâfla etdiler bahs u nazar
Olmamış bu mes'ele tam hall bu âna kadar
Gayrıdır tedbîr eden hikmetce kavl-i mu'teber
Kendi bir seyyâledir kim işlerinden bî-haber

Kuvvet-i âteş gibi makinesin tahrîk eder
Kimse olmazsa telgrafda çıkar mı bir eser

Halka-i ömrüm hemân tenk olmada subh ü mesâ

"Accilû bi't-tevbeti kabel'l mevt"dir âcil devâ

Ol hakîkat başka vech ile olunmaz irtisâm
Bir şu'â-ı nûr-ı Hakk'dır yok ânınçün in'idâm
Eyleyin bu sözlere sarf-ı kemâl-i ihtimâm
"Kul hüve min emri Rabbî"dir ana ta'rîf-i tâm
Rûh suâlinde bu kavli okumuş Fahrü'l-enâm
Hep bu re'ye tâbi' olmuş zümre-i ehl-i kelâm

Halka-i ömrüm hemân tenk olmada subh ü mesâ

"Accilû bi't-tevbeti kabel'l mevt"dir âcil devâ

İşte bu sırr-ı garîbden 'akıllar hayrândır
İnkişâf-ı künhü mutlak mu'ciz-i ezhândır
Gerçi ba'zı hâllerin idrâk eden vicdândır
Bu vücûdda tahtı kurmuş müstakill sultândır
Muktezâ-yı dîn-i İslâm borcumuz îmândır
Maksad-ı Tahsîn hüsn-i hâtime ihsândır

Halka-i ömrüm hemân tenk olmada subh ü mesâ

"Accilû bi't-tevbeti kabel'l mevt"dir âcil devâ

Hoca Tahsin Efendi

Rahmetullahi Aleyh