Sîne-i Şevkimde Bir Hırz-ı Yakînimdir Kitâb

GAZEL

Sîne-i şevkimde bir hırz-ı yakînimdir kitâb

Dîde-i endîşede nûr-ı mübînimdir kitâb

Ondadır envâr-ı Kur`ân ondadır feyz-i hadîs

Âb ü tâb-ı ravza-i îmân ü dînimdir kitâb

'Âlemin mâzîdeki ahvâl-i günâgûnunu

Keşf içün mu'ciz-nümâ bir dûrbînimdir kitâb

Niçe bin ma'nâ-yı kudret gösterir her cilvesi

Dîde-i hak-bîne yâr-ı meh-cebînimdir kitâb

 'Âlem-i ervâhı me'vā eyleyen yârân ile

Güft u gûya bir tarîk-i nev-zemînimdir kitâb

Yâdigârıdır niçe 'allâme-i dânişverin

Zîb-i dest-i hürmetim fahr-i güzînimdir kitâb

Dilber-i nev-hatta bakmam vâr iken hatt-ı sütûr

Dil-sitânım dilber-i feyz-âferînimdir kitâb

'Âlemin her faslını siyyân eder eğlencesi

Ḫoş geçer 'ömrüm benim huld-i berînimdir kitâb

Ey Emîrî her fazîlet ehli şâyândır dese

Bâ'is-i feyzim enîs-i nâzenînimdir kitâb

Ali Emîrî Efendi

Rahmetullahi Aleyh