Âşıkân ki Câm-ı Hakk Nûş Etdiler

NUTK-İ ŞERÎF

Âşıkân ki câm-ı Hakk nûş etdiler

Genc-i Hakk'ı buldular bûş etdiler

Her ki duydu sırr-ı Hakk'dan bir eser

Vermedi nâ-mahreme hergiz haber

Leblerinden gerçi hiç gelmez sadâ

Dopdoludur dilleri zikr-i Hudâ

Ol kişi bilmek gerek gayb âlemin

Kimseye fâş etmeye vuslat demin

Ol bilir sırr-ı celâli ey velî

Lâl ola susan gibi anın dili

Vermeye esrâr-ı sultândan haber

Pîş-i zâga dökmeye şehd ü şeker

Bahr-i vahdet mürgüyüz biz ey civân

Dilimiz deryâ bilir ancak hemân

Sûreti üzre yaratdı bizi Hakk

Vaf-ı Hakk'dan vasfımız alır sebak

Nice görsün bizi bu halk-i cihân

Bir çöpün altında bahr olmuş nihân

Ma'denem kandem nebâtem sükkerem

Kande kim sükker yenir hep ben yerem

Cismimi sakın görüp aldanmanız

Zâhir âdem gibi âdem sanmanız

Mustafâ'yı gördü kâfirler meğer

Dedile rki bu beşer biz de beşer

Bilmediler cismini hem nûr idi

Sandılar kim kendülerden biriydi

Gün gibi gark olmuşam envâra ben

NÛrdan fark olmağa yok çâre ben

Ben namaz kılup riyâzât etdiğim

Hem zekât verüp Hicâz'a gitdiğim

Ta'lîm içündür hemân dervîşlere

Tâlibân-ı râh-ı hak dilrîşlere

Yoksa bundan düşürürdüm zahmeti

Dost ilinde kurar idim tahtımı

Hâba varsam gördüğüm ben düş değil

Tâlibe düş sanmak anı iş değil

Düş bu âlemdir ki kalır bunda bu

Sandığın düş bâkî kalır cânda o

Çünki göz yok sende bâtın görmeğe

Yüz de yok görüşe yüzler sürmeğe

Bâri dahletme sakın görmüşlere

Şol Cenâb-ı Hazret'e ermişlere

Vâr ise sende eğer 'ayne'l-yakîn

Görünür her zerrede bir nûr-i 'ayn

Seni âgâh eyleye Hakk'dan yana

Her biri vere haber Dost'dan sana

Anlamaz dervîşleri her kör ger

Her kişi almaz bu esrârdan haber

Hakkıyla dervîşler işler işleri 

Sanmanız beyhûdedir cünbüşleri

Pâdişahlardır ki yok 'azl anlara

Âlemi Hakk eylemiş bezl anlara

Gözlerine hiç görünmez mülk ü mâl

Dâimâ istekleri ol Zü'l-Celâl

Bu göze olmaz ayân-ender-ayân

Bakma sûret âlemine ey civân

Cân gözün aç sûret-i Rahmân'a bak

Çeşm-i İblîs'e görünmez nûr-i Hakk

Bağlayagör çeşm-i İblîs'den gözün

Hakk'a döndür meğer telbîsden yüzün

Bundan etdin gönlünü vîrâne sen

Dahledersin cân vermiş câne sen

Halk-ı âlem anın içün azdılar

Evliyâyı zâhir âdem sezdiler

Yani az kimse haberdâr oldular

Evliyâyı binde biri buldular

Evliyânın cismidir mir'ât-ı Hakk

Hakk'ı görmek istersen bunlara bak

Seyyid Nizâmoğlu Seyyid Seyfullah

Kuddise Sırruh