Gönlümüz Buldu Ferah Ez Sadâ-yı Aşk

NUTK-İ ŞERÎF

Gönlümüz buldu ferah ez sadâ-yı 'aşk

Zevk-yâb oldu bu cân ez nevâ-yı 'aşk

Cihân doldu gulgule hurûşundan

Lîk gâfilin gûşuna girmez nidâ-yı 'aşk

Cân-durur her lezzet-i nevâyı alan

Nefs ü ten bilmez nedir safâ-yı 'aşk

'Aşk likâsıyla bakî olur rûh u cân

Çeşm-i 'akl ile ten bulur fenâ-yı 'aşk

Kimse bilmez 'aşk hâlini illâ 'âşık

Bilir ancak ne-durur asl-ı mâcerâ-yı 'aşk

'Âşık olan vârını ifnâ eyler

Bes-durur ana ki geldi kimyâ-yı 'aşk

Târumâr ider cümle hevâ-yı mâsivâyı

Geldiği demde çün ol hevâ-yı 'aşk

'Âşık yüzünden gösterir nice muhabbet-i şevk

Ma'şûk yüzünden ider cilve-nümâ-yı 'aşk

'Âr u nâmûs perdelerin cümlesini ref' ider

'Âşıkın 'âlemlere rüsvây ider sevdâ-yı 'aşk

Cümle eşyâ anın hüsnünün mir`âtıdır

Bu merâyâdan dâim ider îmâ-yı 'aşk

Hazzın alır her biri bir hâl ile

Türlü tertîb eylemiş çün icrâ-yı 'aşk

Cân kulağına gelir nice bin âgâz

Çok safâlar kesb olur ez nây-ı 'aşk

'Aklını yağmâ edüp hayrân olur

Kim ki sermest ola ez sahbâ-yı 'aşk

Gûşuna girmez 'âşıkın tabl u kös

Dopdoludur cân evi gavgâ-yı 'aşk

Zâhidâ 'âşıkları mecnûn deyü tân eyleme

Anları dîvâne kılmış-durur rüsvây-yı 'aşk

Sofu tesbîh ü namâzın terk ider

Görse eğer zerrece likâ-yı 'aşk

Sûzî'nin kaydı değil hâl-i cihân

Anı müstağnî kılmış-durur gınâ-yı 'aşk

Ahmed Sûzî

Kuddise Sırruh