Lezîz

NUTK-İ ŞERÎF

'Ârifâne kıl nazar eş'ârıma baldan lezîz

Sâye-i lutf-i Mesîhâ 'ârife cândan lezîz

Zarf-ı zevkdir her hurûfu kâse-i meydir sözüm

Sâf-i dil iç sen de gör bak âb-ı hayvândan lezîz

Gel hayâl-i hâme düşme herkese Hakk'dır veren

Her hüneri şübhesizdir olmaz 'irfândan lezîz

Âdemin mikdârı ma'lûmdur bu hikmethânede

Ehlini bulsa bilir yok derde dermândan lezîz

Sen murâdın terk kıl cânân murâdın hâsıl et

Zevk-ı dilde bulmaz isen feyz-i Rahmân'dan lezîz

Ol derûndan âşinâ mir`ât-ı dilden yâri gör

Hâşâ lillâh hiç olur mu câna cânândan lezîz

Cân gözü cânân yüzünü seyr eder güneş gibi

Lutfî'ye bir lutf olur mu böyle ihsândan lezîz

Alvarlı Efe Hâce Muhammed Lutfî

Kaddesallahu Sırrahu'l-Âlî